九州自由行－必到巨峰盛產地田主丸、摘巨峰提子、食巨峰提子雪糕

交通資訊

八月盛夏，就係踏入巨峰提子嘅盛產期，而日本九州就係巨峰提子嘅盛產地。由福岡出發，搭新幹線到久留米站轉車，大約大半個中頭就可以去到一個叫田主丸嘅車站🚂 ，呢到就係成個九州最多巨峰果園嘅地方喇。

田主丸站係一個好鄉村嘅車站，係小小嘅車站入面就會見到田主丸嘅觀光案內所。門口有觀光地圖攞架，上面有齊哂所有田主丸區內嘅巨峰果園。而我地去之前己經上網睇中左其中一間架啦，但無論去邊一間果園，全部都無需預約，係車站可以直接所以直接就同案內所講。每個果園都編左個號碼，簡單用英文同案內所職員都可以溝通到。佢地就會幫我地聯絡果園，果園就會派車接你去架啦🚗。

我地揀嘅果園係堤果樹園🌲，離田主丸站車程五分鐘左右。打完電話大約十分鐘左右。果園就派左一架私家車，載我地入去。上車之前，案內所職員會比一張印中文嘅指引你，提醒我地摘巨峰提子嘅注意事項同埋價錢。💸

有d果園既位置距離車站都幾遠架，除左果園係車站接送之外，自駕遊去都係一個吾錯既選擇。自駕遊去嘅朋友唔洗擔心，果園前空地係可以停車架。

試食、試摘報告

去到果園嘅職員就會比一碗新鮮巨峰你試食，完全免費架！果園入面嘅巨峰除左大粒之外，仲好香好甜添😋 比起係香港買到嘅巨峰，呢度嘅巨峰無好大陣酒味，而反味道係淡淡咁滲出黎～巨峰提子食嘅時候記住推入面嘅果肉出黎就可以，提子皮唔一定要食架，但係呢度嘅巨峰提子相對較薄，比較容易咬爛，又無咁澀，只係有少少"鞋"同苦，所以F妹都有食埋😍 試食完，就可以去拎個籃同較剪去揀啦。果園入場費免費，摘幾多就比幾多錢，八月中摘既話要1300yen/kg，我地去個時八月尾，就1100yen/kg。每串提子都用紙袋封住架，摘嘅時候就可以係紙袋下望一望岩唔岩心水 (個到園主教路～揀又大粒又深色就係正野喇😁) 岩先剪落黎呀，記住唔洗拆紙袋架！我地個日摘，大概三串左右就有1kg架啦🍇🍇🍇 呢間果園仲有一個好值得去嘅原因，就係超好味巨峰提子雪榚。日本人好鐘意食軟雪榚，不過旅遊景點嘅雪榚多數都好甜，無乜特別咁。但呢個真係超級無敵霹靂咁值得推介，仲要價錢只係300yen咋!巨峰提子雪榚調方無落到好多奶，食落去覺得幾棉，滑滑既口感，但唔係creamy個種，食落吾覺得好甜，反而感覺好似食緊巨峰唧雪芭咁，一入口就融做天然嘅巨峰提子汁，好香好好味，食完即刻想買多杯！🙈🙈🙈