任摘五款日本士多啤梨品種－元朗大棠朗屏果園
去日本旅行其中一個好受歡迎嘅節目，就係到果園摘水果啦～之前我地介紹過係九州福岡県嘅巨峰提子果園。原來係香港都有種植日本品種生果既果園架，夏天有巨峰提子摘，依家天氣乍暖還寒，去到果園就有得摘士多啤梨啦！果園位於元朗大棠，果園外有大片停車場泊車架。另外都可以係朗屏西鐵站轉搭K66號巴士入大棠，係迴旋處落車行過去都只係三分鐘左右炸。
果園種植嘅全部都係日本品種嘅，包括有佐賀清香、熊本紅臉頰、福岡甘王、靜岡章姬同埋奈良紅寶石五種。收成期去到四月尾左右。
去到門口唔需要收入場費架，只要拎起個籃同較剪就可以開始摘架啦。揀士多啤梨當然要又紅又大粒架啦，但係要睇清楚有無爛先好剪呀。想要幾多就剪幾多。之後就出返果園門口磅重啦。
所有品種都係$80一磅架！士多啤梨壽熟得好快，簡個時要以果肉越鮮紅越好、葉越綠越好。
門外有個小花園，大家可以坐底慢慢品嚐新鮮摘落黎嘅士多啤梨啦。咁多款其實好多都好甜好多汁，但係就各有特點。
福岡嘅博多甘王，就係香港入口最多嘅品種～ 色澤紅潤，比較軟身d，甜度非常之高！ 英文名 Amaou 取自あ（紅色）、ま（圓潤）、お（大顆）及う（美味）的日文拼音。聽個名都知係正嘢，連個頂都一樣甜！
奈良紅寶石就夠哂大粒，食落又甜又多汁架。
佐賀清香比較細粒，食落甜度雖然唔高，但就有淡淡嘅香味。
靜岡章姬就比較尖身，甜得黎特別有清爽嘅感覺。
熊本紅臉頰就香味十足，亦都好大粒！
以下係小小採摘貼士仔 :)
記得揀d色澤紅潤、形狀飽滿既士多啤梨，咁先會又甜又多汁～
摘既時候吾好太用力壓d士多啤梨，同埋吾洗連根拔起架～
係士多啤梨既莖上1cm既位置剪就得架喇 :)
去之前打去問下當日收成如何，同埋要早d去呀，如果吾係就比人摘哂架喇～
網址: http://www.yl.hk/lpsb
地址: 元朗大棠路大棠村D.D.117, Lot500-501A段
電話: 9251 8926
